FABRIKA E TRIKOTAZHIT KORÇË
Nga Arben Beli

90 VJET INDUSTRI
THEMELUAR NGA ALI DEMIR ALIZOTI

Në fillim të shtatorit 1925, për herë të parë në Shqipëri, u hap në Korçë një fabrikë trikotazhi. Kjo sipërmarrje u realizua nga Ali Alizoti dhe ortaku i tij Nazima Ypi (daja i sportistit të mirënjohur Asllan Rusi).
Për blerjen e makinerive shkoi në Gjermani Nazima Ypi, i cili ishte specializuar në këtë vend në fushën e tekstileve të trikotuara.
Makineritë e para te ardhura ishin manuale, ato u zëvendësuan më pas edhe me makineri elektrike.

Kapitali për këtë investim u sigurua nga shitja e pronave të Ali Alizotit dhe Nazima Ypit të ndodhura në Veria dhe Kozhan të Greqisë.
Fillimisht ndërtesa ku fabrika filloi veprimtarinë ishte para shtëpisë së Memeda Shtyllës dhe më vonë në ndërtesën e Sabri Qytezës.

Në vijim sipërmarrja kaloi prapa hotel Palas, në dyqanet e Vasillaq Moskës (në bulevard), në Rr. Naim Frashëri Nr.21 dhe më në fund në Tiranë në bllokun e dyqaneve (të cilat do të bëheshin një kompleks dyqanesh shtetërore).
Teknologet që nevojiteshin për funksionimin e fabrikës ishin zonjat e zonjushet e ardhura nga Greqia madam Gjylatër zonja Dikrani, zonjushat Agavni, Siranush (bija e madam Gjylaterit, modeliste) etj.Zonjat në fjalë ishin me origjinë nga krahina e prodhimit të sixhadeve të Armenisë.

Duhet theksuar se zonja Gjylater ngriti linjën e sixhadeve persiane në Shqipëri.
Kjo linjë nuk pati jetëgjatësi, pasi u prodhuan vetëm dy sixhade të kontureve të mëdha.

Kështu u përgatit një halli me përmasa 5m x 3.5m, dizenjo e së cilës përmbante: fushën e blertë anash me lule dhe në pjesën qëndrore ishte mbreti Zog mbi një kalë të bardhë (sipas një pikture të artistit Spiro Xega) e cila u vendos ne pallatin mbreteror.

Kjo sixhade, mjaft e goditur artistikisht dhe profesionalisht, u zhduk kur pallati mbretëror u grabit me hyrjen e Italisë Fashiste në Shqipëri.
Ndërsa sixhadenë e dytë, Ali Alizoti ia shiti Ambasadës Jugosllave në vitin 1948.
Rreth viteve 30, po në Korçë, Nazima Ypi krijoi edhe një fabrikë tjetër trikotazhi me Fadil Garon dhe Ismail Kapshticën,meqenëse linja e sixhadeve nuk e pati suksesin e pritur.

Ndërkohë Madam Gjylatëri, u caktua mësuese në “Shkollën Qytetëse të Vajzave” në Korçë. Këtu ajo përgatiti dhjetra kuadro, të cilat punuan më pas si specialiste në punishten e sixhadeve të Korçës që drejtohej nga Garo Avakian, pinjoll nga familjet ermene te sjella për fabrikën e trikotazheve.

Fabrika kishte ngritur një dyqan shitje në Tiranë në kompleksin tregtar “Vllazën Juma” në Rr. 28 Nëntori (që u dogj gjatë luftës së Tiranës Nëntor 1944) dhe një tjetër dyqan luksoz në Vlorë që administrohej nga Ahmet Nurja.

Në bazë të një dekreti të posaçëm, të nxjerrë në vitin 1947 nga presidenti i R.P të Shqipërisë, pa asnjë shpërblim fabrika në Tiranë u shtetëzua.
Ishte pikërisht kjo fabrikë që do të përgatiste plejadën e qindra punëtoreve të specializuara për të punuar në trikotazh dhe në saje të kësaj tradite kjo industri funksionoi deri vone.

Ing. Demir Alizoti
Pergatiti Arben BELI