Poezi nga Gentjan Hasanas

Poezi nga Gentjan Hasanas

------------------------------

Doli plumbi nga zemra
mbushi një krehër revolveri,
gishti u tërhoq nga këmbëza;
mollët e rrëzuara
u ngjitën nëpër degë.
Ne të dy...
ngrihemi nga shtrati,
fillojmë e veshim lakuriqësinë;
mbaron me një puthje,
më thua ''aud et!''.
Pastaj...
shkojmë dorë për dorë
buzë liqenit
që po u kthen ujin lumenjve
...(volos..2..1..17.(

-----------------------------------------------------------------

                                                           Fantazmat, 

maskuar si pisha, 

zbresin malit 

nuse me të bardha.

Kuajt

me shkëmbinjë më ngjasojnë, 

orizi, që vjen nga qielli, 

dëborën më kujton.

Sot, 

martohen hijet e bardha 

njërën prej tyre e njoh, 

(premtimet s'treten në asnjë botë).

Pa diell, 

pa zogj, 

pa ngjyrën e livadheve, 

por prapë është bukur.

Këndon 

damari i një lumi nën tokë 

e mua më çahet zemra.

Fluturo, ti Hënë, 

mbi nuset e bardha, 

stolisua ballin me argjend.

E le të thonë për mua: 

"Është i çmendur,

gëzon mes pyllit si i marrë!"

------------------------------------------------------------------------------------------

HEMISFERAT

Ne jetojmë në dy hemisfera të ndryshme,

jemi aq larg sa…

kur ti më mallkon të martë

mallkimet s'më zënë… se këtu është e mërkurë

(Ngatërrohen portat e ditëve e vdesin në udhë)

Të shtunë më the: 

Jam e trishtuar, më dogji malli,

të dielën binte shi,

një vijë rrufeje çau zemrën e qiellit.

Kur…

pema jote mes mollëve, çel dhe hënën,

dielli im ngroh vezët e një ëndrre

Kështu që…

dashuria jonë mbeti e patrup

(Nuk u prekëm kurrë).

Jetojmë 

në dy hemisfera të ndryshme të planetit,

si planeti i trurit me dy hemisferat e tij

Koncepti i një dashurie gjigante

është fëmija i pjellë nga mendja jonë 

për hatër të atij, nuk ndahemi dot…

Gentjan Hasanas

...(volos..14..12..15.(